影碟規格 

Specification

區域及公司
Region 1
哥倫比亞公司
Columbia Tri-Star

畫面比例
-1.85:1
-支援anamorphic
Dual Layer DVD9

聲音規格
英文
Dolby Digital 5.1 
法文
Dolby Digital 5.1

字幕

英文

法文

特別收錄
導演演員評述

製作特輯

預告片

Music Video

電影年份

2002

打開機既朋友對<生化危機Bio Hazard>一定唔會陌生. 由PS1到依家GameCube, 生化系列都出左成四集. 亦都同近年外國既Hit Game, 好似<Tomb Raider>, <Mortal Combat>, <Street Fighter>一樣, 出電影版既機會可以話無可避免. 故事基本上同Game系列無乜直接關係, 不過就有好多Game既影子, 好似女主角就有D似Game第一二集女主角既混合體. 劇情就講失憶既女主角一覺醒來發現自己身處一座大宅, 突然一隊特種部隊攻入大宅並帶走女主角同另一個o係大宅既神秘男子. 原來大宅係生化工廠Umbrella既秘密入口, 特種部隊既目的就係潛入工廠關閉失控既中樞電腦Red Queen. 但係工廠裡面等緊佢地既竟然(?)係一條條既喪屍.

老實講套戲既劇情真係好普通, 全部都係意料之內. 仲有最大既問題係一D都唔血腥, 打開機既會發現部戲無晒Game裡面應有既茄汁位, 喪屍咬人血出, 用打鎗打喪屍又無噴血, 連肢解都無血, 真係幾無癮. 套戲既節奏都尚算okay, 但係就無左Game個種恐怖同不安感. 套戲對我黎講唯一既賣點都算係女主角Milla Jovovich. 片中Milla既造型又sexy又有型, 仲有裸露既鏡頭. 不過其他演員既表現就麻麻, 型又唔型, 演技又無乜, 連D喪屍都唔夠喪. 總括黎講, 對比其他遊戲改編電影, 生化危機已經算係好好, 點都好過之前悶到飛起既羅拉.

畫質

本片畫面美國哥倫比亞廠用左1.85:1 anmorphic既比例. 但係質素可以話強差人意. 畫面既質素好飄忽, 一時會有好多微粒, 尤其係陰暗既場景, D微粒既噪動感仲好強, 特別留意影片22分鐘特擊隊員進入工廠既片段, D黑位完全show晒D跳跳下既微粒. 但係有時畫面既表現又唔錯, 特別係打燈較強既場口, 好似ch11特種部隊攻入電腦室一段, 畫面就非常sharp. 背景既details亦都唔係好足, 唔係太清楚. 色彩方面就保持一區水準, 顏色層次分明. 總括黎講, 我就唔太滿意畫面既表現啦.

音效

音效方面有英文同法文既DD5.1選擇, 表現相對畫質黎講就絕對達到一區標準. 環繞聲既表現唔錯, 前中後置都有發揮機會. 尤其係片中電腦Red Queen時不時用喇叭廣播,D聲前後左右咁走. 其他效果聲都好強. 對白亦都非常清楚. 特別一提配樂非常強勁, 大聲得黎唔會搶左對白同效果聲既清晰度, mix得好好. 另外本片支援英文同法文既字幕.

特別收錄

本片雖然導演暗示遲D會有導演特別版出, 但係呢一版既特別收錄已經好強. 首先係演員同導演既commentary. 參與既有兩位女主角Milla同Michelle Rodriguez, 導演同監製. 成條track基本上比Milla同Michelle霸佔晒,佢地兩位一時又嗌交, 一時又講d無聊野, 講下自己平時打咩game(原來Milla都鐘意打<Grand Theft Auto>), 又同D演員配音. 娛樂成份十足, 但係就一D都唔technical, 電影既資料又唔夠豐富. 如果對兩位演員無乜好感既仲會覺得佢地好煩.

其餘既收錄有五段製作特輯, 分別有長近半小時既Making Of, 講講成套戲既製作過程. 之後有我最鐘意既一段, 呢部份長約十一分鐘既製作特輯, 請到美國怪雞樂手Marilyn Manson講下配樂既過程. 其餘三段係分別關於服裝, 佈景同喪屍化妝既特輯, 長約四分鐘到一分鐘. 之後既收錄有MTV, 演員導演資料. 最後預告片收錄左本片, <XXX>, <MIB2>. <蜘蛛俠>, <Final Fantasy>同香港導演于仁泰既新西片<Formula51>既預告.

總結

作為都玩過三集<Bio Hazard>(計埋<GunSurvior>四集)既我 , 就覺得部戲只係一般. 磨下時間okay, 可以一租. 不過畫質尚待改善, 買就等十二月出既Superbit版希望會有超水準既效果. 至於傳聞出既導演雙碟版, 隨住十二月出Superbit, 好可能要到<生化危機續集>上畫時先會面世.

畫質:

音效: 

特別收錄:

抵買度: 

(為滿分)

回前頁