賽事精華 (27/02/2004)

     今仗喺一個新球場(葵涌草場)迎戰一隊新球隊(冰之谷),據德仔所講呢隊冰之谷初埋班幾好水,估唔到真係無吹水喎。一開波廿七軍已經漸盡優勢,我喺後防都不知幾清閒可以同隻右閘O仔吹水,跟住我仲同阿光仔講話: 「快啲入番兩三球等我地班後防可以調上去做前鋒玩番場」,點不知話口未完就俾冰之谷一個單刀射成一比零。

      雖然我地有廿七軍雲達沙之稱嘅守門員阿競助陣,但係都邊牆莫及目送皮球入網。好彩廿七軍未因先失一球而陣腳大亂,休息之後下半場從新執位,並且邀請到日本外援守門員(寶強朋友)頂替阿競,而阿競就取代阿勝踢清道夫,寶強改踢中堅,而阿威就由中堅轉打中場。轉陣之後嘅廿七軍果然有前有後,最後更取得四個入球添,分別由阿Dick近門執雞同埋一個勁射梅開二度,之後有白毛門前接應橫傳再下一城,最後由含羞係左邊大禁區以左腳戈利拋物線射入埋齋。雖然下半場失一球俾對手,但最後仍以四比二小勝冰之谷。