子淇紀事本末 2/2002-8/2002

February March April May June July 2002

炎炎夏日, 消暑為佳.
八月休站, 秋涼再續.

July, 2002

特此通告

30/7-3/8 去廣州軍訓, 若有要事, 請留言.

27/7

王家衛電影一絕人所共知, 那其參與的喜劇呢?
"天下無雙"就是十分難得有其參與的賀歲喜劇.
論這套戲, 情節既浪漫, 又富娛樂性而不沈悶,
某些鏡頭也十足王家衛風格, 如"東邪西毒".

其實套戲大致是透過梁朝偉,趙薇,王菲&張震
兩對情侶的故事, 訴說甚麼是不世的偉大愛情:
每一個人也有一個獨一無二的"天下無雙".
愛一個人要豁出去, 到達忘我之境,不分你我.

我就一早豁了出去, 可惜還未遇到天下無雙.

23-25/7 (東區聯校 Prefect Camp)

東區聯校領袖生會的包括中國婦女會中學,
中華基金中學, 嘉諾撤書院, 慈幼中學,
張振興伉儷書院 & 筲箕灣官立中學.

今年暑假, JSPA 就搞了一個Prefect Camp,
我身為學校的Team A Leader, 緊係要俾下面,
況且, 去到又可以見返D 筲官老朋友, 聯誼下.
可惜, 我23,25號要教水, 所以被迫遲去早走.
雖然係玩少好多, 但係無計啦, 教水緊要嘛~~

總括而言, 個camp都算好玩, 加上有丞相一齊,
日頭就玩活動, 夜晚就同佢討論些人生問題,
包括中國文化, 有/無神論, 邏輯等哲學問題,
這比起平時在人生無題中有過之而無不及.

21/7

三十號要去廣州軍訓, 而今日就要聽個talk,
主要內容包括活動介紹, 領取制服, 聯誼等等.
不過要去長沙灣咁遠, 途中竟然見到鄭老師,
傾開先知原來佢住荃灣, 原名叫鄭逸敏添~~

原來個camp叫廣州軍事體育學院青少年夏令營,
我真係去度先知, 之前剩係俾錢都唔知詳情,
而家起碼知道個大概情況, 仲有套靚靚制服呢!

ps: 方林林21號生日, 我送左支左輪氣槍俾佢.

19/7

今日朝早見得閒就同方林林去睇早場 MIB2,
部戲真係超搞笑, 但係我嫌佢好似好快完咁,
打外星人d 戲又短. 不過, 廿五蚊仲想點呀?

夜晚教緊拯溺時, 有人頭暈入左去救傷站度,
惠姐(miss)就叫我入去幫手, 同佢做手力急救,
入到去見個靚女(d人咁樣叫佢)幫佢按太陽穴,
我都唔理咁多, 即刻幫佢度位按內關 (穴位).
我學左手力咁耐, 終於有人出現俾我試招啦!

16/7
今日三至六去柴灣教水見到久違了的鄭老師,
每年都係佢帶學生來學游水, 逢暑假先見到佢.
鄭老師性格搞笑好玩, 又年輕又貌美.(哈哈!)
雖然大家很少見面, 但閒談時尤如知己一般,
可惜教水中途不能過份張揚, 因此未能盡興.

教完水之後, 我涼都唔沖, 立即飛奔走人,
因為要趕去七點係李鄭屋的救生員工作坊水試.
趕到死咁終於準時到達, 以為呢次有運行啦!
誰不知入到去, 一等就等左兩個鐘先有得考,
中途仲要橫風橫雨, 個個都凍到抽筋咁樣,
我游完之後隻腳已經痺晒, 好彩最後都考到.

12/7

今朝一早就同D friend 去左柴灣公園打波,
lunch 就同方林林去銅鑼灣皇室睇未來報告,
電腦特技頗悅目, 而且戲中故事既富現代感,
又有未來之感, 導演史提芬史匹堡果然強勁!

夜晚本來要教拯溺, 但係突然間要去教練屋企,
咁唯有先請假. 之後再上到梁教練屋企開會.
上到去見到三年無見兼學成歸來的 Marco ,
他可算是我的游泳啟蒙老師, 見返佢真開心~~

10/7

尋日行街見到二手漫畫超平, 一本只是九大元,
出面市價都要十五蚊啦! 佢而家仲要買五送一,
我見到緊係狂買啦, 最後買左$90. (10本+2本)

今日學校 last day, 圖書館俾人借成十本書,
我放學之後立即衝去圖書館, 借盡十本先走,
包括中國近代史, 中國六四真相等新書.
屋企而家勁多書, 呢個暑假肯定忙到抽筋~~

3/7-5/7

這幾天實在太忙了, 星期三又要領銅十字証書,
又要剪頭髮, 夜晚又去左方林林屋企玩電腦.
星期四朝早返學校補中化, 夜晚六點教水,

今日就朝早九點半入西環教, 真係疲勞轟炸!
因為三點三要睇牙醫, 所以朝早教完水之後,
就唯有先返屋企無聊, 之後再出發中環睇牙醫.
睇完牙醫差不多五點, 跟住又迫住要行街,
點解? 因為仲要係六點九去天后教拯溺囉!

其實都談不上是教人, 只是義務性質幫下手,
不過起碼可以從中偷師, 幫助日後考拯溺助教.
這一天還未完呢, 仲要上史洛高屋企借啞鈴,
哇~ 真係重到嘔! 我返到屋企都已經身水身汗.

1/7

今日對香港來說可算是個特別富紀念性的日子,
其一, 是香港回歸紀念五周年.
其二, 是第二屆行政長官就職的日子.

本來開開心心的一日假期, 市民卻未能盡興,
新聞話市民見到璀燦煙花也是百感交集,
這主要是由於近年來的經濟不景情況影響.
頭五年過去了, 希望香港之後有一番新氣象.
那麼, 香港市民就可以重拾昔日歡笑了!

June, 2002

30/6

今日lunch 勁無聊, 係筲箕灣權發食完飯之後,
去左天悅廣場間xx冒險樂園睇D人玩"推銀機".
十分奇怪, 多數係D 阿伯阿婆玩, 一玩幾百蚊.
同個阿伯傾開, 先知佢玩左成千蚊, 幾豪氣呀!

世界盃終於曲終人散, 我又少左個好消遣啦~~

27/6

尋日教完水, 就叫陳宗宗去我屋企睇波兼過夜,
今朝我地兩個一早彈左起身, 無無聊聊睇漫畫,
我見無野做就即刻call 埋方林林去我屋企玩.

玩咩? 玩映相囉! 我地同屋企D 公仔玩映相,
一開首就玩世界盃, 映D 高難度射波動作....
之後我地就開始亂咁映, 咁就玩左成個lunch.
因為而家不能上傳, 大家要遲D 先可以睇到.

25/6

今日同米高去又一城睇鬼水凶靈(Dark Water),
完全係承襲午夜凶靈, 入面D 情節真是差不多,
唯一不同, 又是最搞笑的地方就是用左無限水,
大家如果係戲院的話, 就會聽到笑聲叫聲混音.

唉~~ 南韓隊始終都係贏唔到德國入決賽,
我仲想佢地贏完德國, 然後下場贏埋世界盃,
可惜而家未能如願以償, 唯有希望佢贏到季軍.

22/6

今日又要成日入上水, 正愁無得睇波之際,
係四點幾休息的時候, 竟然聽到有線講波聲,
於是立即跑去人群之中, 果然真係做緊世界盃.
真係估唔到連展能運動村都有有線! 勁正!

最後睇到南韓擊敗西班牙, 真係開心到彈起.
終於有亞洲球隊打入世界盃四強, 光宗耀祖,
不但可以打破世盃壟斷局面, 更為亞洲爭光~~

19/6

lunch 同兩個摩門教徒論道先知道佢地既生活,
無收入, 無津貼, 自己貼錢隻身來香港傳道,
每個月限住用$400 美金, 真是不足為外人道.

夜晚ronnie同司徒突然間打電話約我落街飲野,
見咁耐無見就出去聊聊, 約埋方林林同李淇.
係咖啡室度我地狂講笑, 聊到人地打烊先走.
雖然聽日考 History, 不過朋友敘舊無法啦~~

ps: 我終於儲齊42期龍珠啦! HaHa~~~

17/6

美國又再次咁好運啦, 俾佢入到八強, 唉~~
今晚超搞笑, 方林林問李淇借左部digital,
睇完巴西對比利時之後, 我地就係度狂影相,
係屋企周圍亂咁影, 又好玩野咁影左勁多張.

幾經辛苦, 我終於整理好D相, 放左上網,
大家可以到 My Story 睇睇, 都幾搞笑架!

15/6

討論區終於得以重見天日, 有了全新的版本!
以後都唔會link 去警察網頁, 可惜的是,
因為之前討論區出現問題, D訪客已經唔見晒.
幸好, 小吉妹仔^_^ 仍然十分支持, 非常感動.
而家唯有希望討論區能夠盡快回復當年之盛況.

13/6

唉~ 中國隊技術始終未見成熟, 每場表現參差.
上場對巴西之戰, 球員技術已見顯著改善,
但今場賽事卻一榻糊塗, 後防球員極度混亂,
九分鐘就俾人射入兩球, 想唔輸都幾難啦!

以前睇足球小將, 知道有一式叫"倒掛金勾",
可能是閱歷淺, 我從未見過真正的倒掛入網.
不過我今日見到啦, 果真是嘆為觀止, 勁到震!

11/6

Bye Bye la,法國隊~~ 衛冕冠軍最終都要出局.
其實真係幾慘, 第一場就爆冷輸俾塞內加爾,
第二場又贏唔到, 搞到今場一定要淨勝兩球,
但淨勝丹麥兩球談何容易? 施丹出場都難啦!
何況佢又未好返兼打少個, 所以最後都要輸波.

哇! 喀麥隆對德國場賽事打到超激, 犯規極多,
雙方火藥味甚重, 最後竟然總共有十多面黃牌,
完全是"黃牌大平賣", 兩隊肯定罰錢罰到笑~~

9/6

今朝七點就入左淺水灣做渡海泳比賽 Helper,
工作是坐係架艇仔度跟住D女泳手睇有無犯規.
佢地真係好強, 全程游三個圈, 總共10000米.
第一名游完都要兩個鐘頭零幾分, 都咪話唔勁!

今次係首次做國際賽 Helper, 真係獲益良多,
除了睇到國際級水準, 仲感受到其認真程度,
所以, 雖然聽日考試, 我豪一日出來也是值得.

8/6

今朝落肯德基又見到之前提到的"KFC三姊妹",
唔知係咪多謝我上次幫佢地, 當我買餐時,
私人醒我四件雞. 此真謂好心有好報, 嘿嘿~~

Lunch 入左淺水灣考銅十字, 表現尚算ok.
考完再游多陣水, 之後去食完野就立即返屋企.

以前唔識睇波就以為巴西隊最勁, 一直夢想:
如果中國隊可以係世界盃同巴西隊比賽就好啦!
今晚我就夢想成真啦~~ 雖然中國隊係輸四蛋,
但無疑今晚佢地表現超卓, 完全是雖敗尤榮!

6/6

今日跟啊Sir 買望遠鏡, 所有均一價二百,
其實係間舖頭執笠先咁平, 我就一於好少理,
立即執平野, 買左個標價二千幾的看下門口.

今日返學仲同人講"法國讓一球都sure win啦",
誰不知今晚烏拉圭激戰法國, 0比0打完場.
雖然戰果出乎意料, 但雙方也十分落力,
全程90分鐘也從沒放鬆, 表現值得一讚!

4/6

唔知有意定無意, 係六月四這些敏感日子,
竟然是中國隊首場世界盃決賽周的日子!
其實真係幾搞笑,不過咁樣起碼會少D人搞野掛.

畢竟中國隊也是世界盃新秀, 國際賽經驗尚淺,
雖然輸了, 但表現不差, 而日本南韓實力強勁,
見到東亞足球有如此進境, 我也十分安慰.

2/6

今日去北角幫手砌磚仔, 十一點做到五點,
一走得就即刻返屋企睇世盃 (要睇碧咸嘛!)

睇完英格蘭對瑞典就落街買KFC食,
途中見到三個妹仔派KFC傳單, 好心幫幫佢地.
返轉頭又見到, 仲問我可唔可以幫佢地上樓派.
我倒無所謂, 途中先知佢地F3, 做 part time.

唉! 細細個就要做part time, 而家咩時勢呀?
不過, 我F3都有做part time 喎, 唯一不同是,
我一個鐘賺 $100 兼唔晒開 OT 派傳單 ^.^

1/6

今日真係忙到嘔, 朝早又要入跑馬地做體能,
lunch 又要入淺手灣幫手, 搞到無時間睇世盃.
幸好返到屋企睇到半場烏拉圭vs丹麥, 到夜晚,
再睇埋德國vs沙特阿拉伯, 實力果然很大差距,
但差距大到俾人數8球, 果真是無話可說了!

睇報紙先知原來今日係國際兒童節,
真係唔講唔知! 就此祝天下兒童健康快樂.

May, 2002.

31/5

世界盃今日開波, 可惜要上"手力"無得睇,
返到屋企先知法國0:1輸俾塞內加爾, 真慘!
"驕傲自滿可能會是法國隊在世界盃衛冕
道路上最大的障礙。" Yahoo 球隊簡介.

30/5
今晚上了堂 (拯溺) 銅十字章的預習課,
發現勁多野唔記得, 包括心肺復甦法, 驚到震!
畢竟, 之前個銅章也是兩年前考, 唔記得不奇,
而家唯有盡快恢復記憶, 平平安安考多個章.
世界盃最後倒數一天, 球迷們要準備了!

27/5

任何垃圾, 一律六百, 今日實施.
請各位垃圾虫留意, 清潔香港, 人人有責.

25/5

今日試戴隱形眼鏡超搞笑, 試左成個鐘先成功.
之後去左東方188, 見到有星矢扭蛋抽,
作為超級Fans 緊係即刻抽啦, 最後抽左$20,
抽到一輝 & 啊瞬兩兄弟, 而家擺係屋企窗台.

23/5

今日因為要睇牙, 所以被迫早退, 無上五堂.
lunch 去左中央溫書, 主要是因為七點上堂.
上咩堂? "手力急救"是也! 拯溺課程之一.
不過我都只是陪朋友坐, 因為我一早考左.
方林林, 陳宗宗, 我都算夠朋友掛!

21/5

久未露面於討論區, 見得閒就去逛逛,
誰不知仍然同樣問題, link左去警察網頁.
試左超級多次先留到言, 激到我傻!

17/5

今日學校教師培訓日, 不用返學,
見得閒就係屋企嘆嘆, lunch 去了配隱形眼鏡.
試戴時超搞笑, 可能是不習慣, 試好耐先戴到.

15/5

兩年前我俾左架 AE86 朋友砌,
兩年後的今日, 佢終於俾返我啦.
是否遲了一點? 不! 只是......
這套漫畫熱潮已經過了十世罷了.

14/5

今日朋友方林考完會考, 因為太無聊搵我.
我亦十分明白, 會考後的日子確實十分難捱.
於是我就將全屋玩得睇得既野俾晒佢消磨時間,
而家仲要幫佢構思下往後的日子怎樣過.
咁優閒的生活, 真令我十分羨慕.

11-12/5

這個周末真忙透了!
周六一朝早入上水, 夜晚又要返柴灣食飯.
星期日晚又要母親節聚餐, 咁就無左兩個夜晚.
值得一提的是周六買左頂英軍頭盔,
又硬又重, 而家我套左係我屋企個人頭公仔度.

7/5

蜘蛛俠電影真係等到頸都長, 但係終於等到啦.
作為蜘蛛俠 Fans, 無理由唔捧捧場 ga?
所以今日 lunch就去左康怡睇"Spider-Man"!
蜘蛛俠 & "綠魔"套杉真係超 Cyber.
故事節奏 OK, 唯美中不足是並非跟足原著.
"能力越大, 責任越重"是這部戲的總結.

5/5

Oh No! 百佳、惠康玩野, 大集團壟斷市場,
搞到聽日無新鮮豬供應, 之前無新鮮雞,
而家就無新鮮豬, 真辛苦了各家各戶"師奶".
今晚看過"鏘鏘集"才知道某些旅行團超奸姣,
又迫D大陸遊客買野, 又借機呃佢地錢.
如果香港想發展旅遊業, 唔該拉晒班奸商先.

3/5

今日考英文(Syllabus B)卷一&卷二,
我想對大部分會考生來說也算是大日子.
至於我這個"超齡會考生"也不例外,
因為今年我都有報嘛, 不過剩報英文.
總結今日表現不過不失, 簡直是 well done.
因為全部識晒, 希望今年考個好成績啦.

1/5

"五一節"簡介:
五一國際勞動節亦稱“五一節”，在每年的五
月一日。此節源于美國芝加哥城的工人大罷
工。它是全世界勞動人民的共同節日。

今日可算是特別日子,
我也以它作為一個小小的分水嶺,
跟我的網頁作一個小翻新,
加入了"Diary" & "Discussion".

就此祝願全世界無產階級
從此也不用再受壓迫、剝削.

April, 2002

28/4
《銃夢》凱奧斯:
心裡沒有夢想，人便會死掉。
但一直秘而不宣，不付諸行動的話，
夢想便會逐漸腐化。

我也有過取得好成績的夢想,
但我卻任由它逐漸腐化.
現在唯有將它實現才可將功補過.

20-21/4

今次是我第一次參加"饑饉三十".
活動開始時間是下午二時,
所以之前我就同朋友狂食野充飢先.
一開始是開幕典禮, 有頗多明星出席.
接著是開幕音樂會同埋一D無聊活動.

話咁快就到夜晚, 但因為無帶褸而凍到死.
訓覺如是, 一直捱到第二朝, 真係超搞笑!
更好笑的是, 第二日竟然熱到死兼晒到嘔.
時間轉眼就過, 終於到了最後的閉幕音樂會,
表演嘉賓有楊千嬅, 黃貫中, 鄧健泓等等.

最後, 我地望住個大鍾一齊倒數,
一倒數完畢, 我地立即飛奔去搭車,
出到銅鑼灣, 去左飽餃店食飯,
三十個鍾頭的空虛感, 不消一會便填補掉.

16/4

今日可算是我們"On-Fire" 的大日子,
因為今日我地第一次著件波衫打波,
可惜好多人唔得閒要早走, 未能盡興.
詳情可到 "My Story" 睇睇.

15/4

哈哈~~ 期待以久的波衫終於有啦,
這是我們 6A人的籃球隊,
隊名為 On-Fire , 現共有15位隊員.
我件球衣號碼係11號, 背後寫 Chi-Kei ,
球衣顏色橙+黑, 著上身都幾威 ga!

14/4
今日去o左遊船河, 但竟然破天荒地無游水.
這全因為下水前見到成海水母,
驚到唔敢落水, 最後唯有留係船度.
夜晚落船後, 順道去埋朋友新居.

11/4

今晚去藝術中心看了一套頗有深思的話劇,
名為"搵食男女" (Eat, Money, Man, Woman)
它有趣的地方是以一個幽默抵食的角度,
一些生活趣事來表達一個哲學問題-人生.
表達方式有趣而不呆板, 頗易令人接受.

7/4
十一日假期終於完結, 就此來個小總結:
這次復活節假比新年, 聖誕來得充實.
起碼上兩次是呆在家的, 今次是去溫書.
而且 Last Day, 即今日仲要做晒 D 功課!
(因為之前剩溫書, 功課完全未做過, 勁哩?!)

5/4